മുതിർന്ന നേതാവ് കെ കെ ശിവരാമൻ സജീവ രാഷ്ട്രീയ പ്രവർത്തനം അവസാനിപ്പിച്ചു

ഇടുക്കി: കമ്മ്യൂണിസ്റ്റ് പാർട്ടി ഓഫ് ഇന്ത്യ (CPI) ഇടുക്കി ജില്ലാ നേതൃത്വവുമായി ഇനി യോജിച്ച് പോകാനാകില്ലെന്ന് വ്യക്തമാക്കി മുതിർന്ന നേതാവ് കെ കെ ശിവരാമൻ സജീവ രാഷ്ട്രീയ പ്രവർത്തനം അവസാനിപ്പിച്ചു. എന്നാൽ പാർട്ടി അനുവദിച്ചാൽ ഒരു സാധാരണ പ്രവർത്തകനായി തുടരുമെന്നും അദ്ദേഹം അറിയിച്ചു.Senior leader K.K. Sivaraman ends active political activities

ഇടുക്കിയിലെ സിപിഐയെ നിക്ഷിപ്ത താൽപ്പര്യങ്ങളാണ് നയിക്കുന്നതെന്നും, പാർട്ടിയിൽ ഏറെക്കാലമായി വിമർശനവും സ്വയംവിമർശനവും ഇല്ലാതായെന്നും ശിവരാമൻ ആരോപിച്ചു. ജില്ലയിൽ സിപിഐ തകർച്ചയിലാണെന്നും അദ്ദേഹം തുറന്നടിച്ചു. പാർട്ടി ഉയർത്തിപ്പിടിക്കുന്ന ആശയങ്ങളോട് നൂറ് ശതമാനം സത്യസന്ധതയോടെ തന്നെയാണ് ഇതുവരെ പ്രവർത്തിച്ചതെന്നും, ഇടുക്കിയിൽ മണ്ണ്–മണൽ–ഭൂമാഫിയകൾ സജീവമാണെന്നും, ചില സിപിഐ നേതാക്കൾ അവരോടൊപ്പം പ്രവർത്തിക്കുന്നുണ്ടെന്നും അദ്ദേഹം പറഞ്ഞു. നിലവിലെ രാഷ്ട്രീയ സാഹചര്യത്തിൽ തനിക്കൊരു ഇടമില്ലെന്ന് തിരിച്ചറിഞ്ഞതിന്റെ അടിസ്ഥാനത്തിലാണ് തീരുമാനമെന്നും, ഇത് പെട്ടെന്ന് എടുത്ത പ്രകോപനപരമായ തീരുമാനമല്ലെന്നും ശിവരാമൻ വ്യക്തമാക്കി.പാർട്ടി പുറത്താക്കിയാലും കമ്മ്യൂണിസ്റ്റായി തുടരുമെന്നും, കമ്മ്യൂണിസ്റ്റുകാരനാക്കുന്നത് പദവിയല്ല—ജീവിതമാണെന്നും അദ്ദേഹം പറഞ്ഞു.

നാലു പതിറ്റാണ്ടിലേറെ രാഷ്ട്രീയ പാരമ്പര്യമുള്ള നേതാവാണ് കെ കെ ശിവരാമൻ. കഴിഞ്ഞ കുറച്ചുകാലമായി സിപിഐ ജില്ലാ നേതൃത്വവുമായി കടുത്ത അഭിപ്രായഭിന്നതയിലായിരുന്നു അദ്ദേഹം. ജില്ലാ സെക്രട്ടറി കെ എ സലീം കുമാർ എന്നിവരോടുള്ള അസന്തോഷമാണ് തീരുമാനത്തിന് പിന്നിലെന്ന സൂചനയും ശിവരാമൻ നൽകി. “പാൽ കൊടുത്ത കൈയ്ക്ക് തന്നെ തിരിഞ്ഞ് കൊത്തി” എന്ന പരാമർശം ജില്ലാ സെക്രട്ടറിയെ ലക്ഷ്യമിട്ടതാണെന്ന വിലയിരുത്തലുമുണ്ട്.

തദ്ദേശ തിരഞ്ഞെടുപ്പ് ഫലം പുറത്തുവന്നതിന് പിന്നാലെ, ജില്ലയിലെ സിപിഐ നേതൃത്വം മണ്ണ്–മണൽ മാഫിയയ്‌ക്ക് ഒപ്പമാണെന്നും സാധാരണ ജനങ്ങളോടൊപ്പം പ്രവർത്തിക്കുന്നില്ലെന്നും ആരോപിച്ച് ശിവരാമൻ ഫേസ്ബുക്കിൽ കുറിച്ചിരുന്നു. തിരുത്തലുകൾ ഉണ്ടാകാത്തപക്ഷം നിയമസഭാ തിരഞ്ഞെടുപ്പിൽ ജില്ലയിൽ പാർട്ടിക്ക് വലിയ തിരിച്ചടി നേരിടേണ്ടിവരുമെന്നും അദ്ദേഹം മുന്നറിയിപ്പ് നൽകിയിരുന്നു. മുൻ സംസ്ഥാന സെക്രട്ടറിമാർ ഉണ്ടായിരുന്ന കാലത്തേതല്ല ഇപ്പോഴത്തെ അവസ്ഥയെന്ന അദ്ദേഹത്തിന്റെ നിലപാട് ബിനോയ് വിശ്വം എന്നിവരോടുള്ള അതൃപ്തിയായും വിലയിരുത്തപ്പെടുന്നു.

15 വർഷത്തോളം സിപിഐ ജില്ലാ സെക്രട്ടറിയായിരുന്ന ശിവരാമൻ, ഇടുക്കി ജില്ലയിൽ ഇടതുപക്ഷ ജനാധിപത്യ മുന്നണി (LDF) കൺവീനറായും പ്രവർത്തിച്ചിട്ടുണ്ട്. ഇടുക്കിയിലെ കമ്മ്യൂണിസ്റ്റ് പാർട്ടി ഓഫ് ഇന്ത്യ (മാർക്സിസ്റ്റ്) (CPI-M)നേതൃത്വത്തോട് പരസ്യമായി അഭിപ്രായഭിന്നത പ്രകടിപ്പിക്കാൻ മടിക്കാത്ത നേതാവായിരുന്നു അദ്ദേഹം. മന്ത്രിയായിരിക്കെ എം എം മണി യുമായി ഉണ്ടായ പരസ്യ തർക്കങ്ങൾ ഇടതുമുന്നണിക്കുള്ളിൽ തന്നെ പ്രതിസന്ധികൾക്ക് ഇടയാക്കിയിരുന്നു.