UPI payment gateway with green tick. New Delhi, India- 17th June, 2023.
നാഷണൽ പേയ്മെന്റ് കോർപ്പറേഷൻ ഓഫ് ഇന്ത്യ 2025 ഫെബ്രുവരി 1 മുതൽ യുപിഐ ഐഡികളിൽ സ്‍പെഷ്യൽ ക്യാരക്റ്ററുകൾ അനുവദിക്കില്ലെന്ന് അറിയിച്ചു. നിങ്ങളുടെ യുപിഐ ഐഡിയിൽ സ്‍പെഷ്യൽ ക്യാരക്റ്ററുകൾ ഉണ്ടെങ്കിൽ അവയിൽ ഉടൻ തന്നെ മാറ്റം വരുത്തേണ്ടിവരും. അല്ലാത്തപക്ഷം 2025 ഫെബ്രുവരി 1-ന് ശേഷം പേയ്‌മെന്‍റുകൾ പരാജയപ്പെടുമെന്നും എൻപിസിഐ വ്യക്തമാക്കിയിട്ടുണ്ട്. ജനുവരി 9-ന് യുപിഐ ഇടപാടുകളിലെ മാറ്റം സംബന്ധിച്ച് എൻപിസിഐ പുറപ്പെടുവിച്ച സർക്കുലറിൽ പുതിയ നിയമങ്ങൾ വ്യക്തമാക്കിയിട്ടുണ്ട്. ഇനി മുതൽ യുപിഐ ഇടപാട് ഐഡിയിൽ ആൽഫാന്യൂമെറിക് മാത്രമേ ഉപയോഗിക്കാവൂ എന്ന് സർക്കുലറിൽ വ്യക്തമായി ഉൾപ്പെടുത്തിയിട്ടുണ്ട്. അതായത്, അതിൽ അക്കങ്ങളും അക്ഷരങ്ങളും മാത്രമേ ഉണ്ടാകാൻ പാടുള്ളൂ. ഇതിൽ മാറ്റം വരുത്തിയാൽ സിസ്റ്റം അത് നിരസിക്കും. ഇത്തരം ഇടപാടുകള്‍ കേന്ദ്ര സംവിധാനം സ്വമേധയാ തള്ളുന്ന തരത്തിലാണ് ക്രമീകരണം ഒരുക്കിയിരിക്കുന്നതെന്നും നാഷണല്‍ പേയ്‌മെന്‍റ്സ് കോര്‍പ്പറേഷന്‍ ഓഫ് ഇന്ത്യ അറിയിച്ചു. ജനപ്രിയ പേയ്മെന്റ് ആപ്പുകൾ ഓട്ടോമാറ്റിക്കായി യുപിഐ ഐഡി സൃഷ്‌ടിക്കുന്നുണ്ടെങ്കിലും, ഉപയോക്താക്കൾക്ക് സ്വന്തമായി ഇഷ്‌ടാനുസൃത യുപിഐ ഐഡി സൃഷ്‌ടിക്കാനോ നിലവിലുള്ള ഐഡിയിൽ മാറ്റങ്ങൾ വരുത്താനോ ഉള്ള ഓപ്ഷൻ ലഭിക്കും. നിങ്ങളുടെ നിലവിലുള്ള യുപിഐ ഐഡിയിൽ എന്തെങ്കിലും സ്‍പെഷ്യൽ ക്യാരക്റ്ററുകൾ അടങ്ങിയിട്ടുണ്ടെങ്കിൽ അത് എഡിറ്റ് ചെയ്യാനുള്ള ഓപ്ഷൻ ലഭിക്കും. ഈ ഫീച്ചർ ഉപയോഗിച്ച് സ്‍പെഷ്യൽ ക്യാരക്റ്ററുകൾ നീക്കം ചെയ്യുക. ഇതുകൂടാതെ, തിരഞ്ഞെടുത്ത പേയ്മെന്റ് ആപ്പുകൾ നിലവിലുള്ള ഐഡിയിൽ സ്വയമേവ മാറ്റങ്ങൾ വരുത്തും. യുപിഐ ട്രാന്‍സാക്ഷന്‍ ഐഡികള്‍ സൃഷ്ടിക്കുന്ന പ്രക്രിയയെ നിലവാരമുള്ളതാക്കുന്നതിന്‍റെ ഭാഗമായാണ് ഈ നടപടി. എല്ലാ യുപിഐ പേയ്മെന്റ് സേവനദാതാക്കളും ഇതിനാവശ്യമായ നടപടികള്‍ സ്വീകരിക്കണമെന്നും നാഷണല്‍ പേയ്‌മെന്‍റ്സ് കോര്‍പ്പറേഷന്‍ ഓഫ് ഇന്ത്യയുടെ സര്‍ക്കുലറില്‍ പറയുന്നു. ഫെബ്രുവരി 1 മുതൽ പ്രാബല്യത്തിൽ വരുന്ന പുതിയ നിയമങ്ങൾക്ക് അനുസരിച്ച് നിങ്ങൾ സമയബന്ധിതമായി മാറ്റങ്ങൾ വരുത്തിയില്ലെങ്കിൽ നിങ്ങൾക്ക് യുപിഐ പേയ്‌മെന്‍റുകൾ നടത്താൻ കഴിയില്ല. ഫെബ്രുവരി 1-ന് ശേഷം നിങ്ങളുടെ യുപിഐ പേയ്‌മെന്‍റുകൾ തുടർച്ചയായി പരാജയപ്പെടുകയാണെങ്കിൽ, അത് നിങ്ങളുടെ യുപിഐ ഐഡിയിലോ ഇടപാട് ഐഡിയിലോ ഉള്ള ഈ സ്‍പെഷ്യൽ ക്യാരക്റ്ററുകൾ മൂലമാകാൻ സാധ്യതയുണ്ട്.
