പരിക്ക് വില്ലൻ; ന്യൂസിലൻഡിനെതിരായ ട്വന്റി20 പരമ്പര തിലക് വർമ്മയ്ക്ക് നഷ്ടമാകാൻ സാധ്യത

ഹൈദരാബാദ്: ന്യൂസിലൻഡിനെതിരായ ട്വന്റി20 പരമ്പരയ്ക്ക് മുന്നോടിയായി ഇന്ത്യൻ ടീമിന് വലിയ തിരിച്ചടി. പരിക്കേറ്റ യുവതാരം തിലക് വർമ്മയ്ക്ക് പരമ്പര നഷ്ടമാകാനിടയുണ്ടെന്ന് റിപ്പോർട്ടുകൾ. വിജയ് ഹസാരെ ട്രോഫിയിൽ ഹൈദരാബാദിനായി കളിക്കുന്നതിനിടെയാണ് തിലകിന് വയറിനേറ്റ പരിക്ക് സംഭവിച്ചത്.

പരിക്കിൽ നിന്ന് പൂർണമായി സുഖം പ്രാപിക്കാൻ മൂന്ന് മുതൽ നാല് ആഴ്ച വരെ സമയം എടുക്കുമെന്നാണ് സൂചന. ഇതോടെ ഈ മാസം 21ന് ആരംഭിക്കുന്ന ന്യൂസിലൻഡിനെതിരായ ട്വന്റി20 പരമ്പരയിൽ തിലക് വർമ്മയെ കാണാനാകില്ല. താരത്തിന്റെ പകരക്കാരനെ ബിസിസിഐ ഉടൻ പ്രഖ്യാപിച്ചേക്കും.

അതേസമയം, ശസ്ത്രക്രിയ ആവശ്യമുണ്ടായാൽ അടുത്ത മാസം ആരംഭിക്കുന്ന ട്വന്റി20 ലോകകപ്പിലെ ഗ്രൂപ്പ് ഘട്ട മത്സരങ്ങളിലും തിലക് പുറത്താകാൻ സാധ്യതയുണ്ട്. കഴിഞ്ഞ വർഷം ഏഷ്യാ കപ്പ് ഫൈനലിൽ പാകിസ്താനെതിരേ അർധസെഞ്ചുറി നേടി ഇന്ത്യയെ കിരീടത്തിലേക്ക് നയിച്ചതടക്കം മികച്ച പ്രകടനങ്ങൾ കാഴ്ചവെച്ച തിലക്, ഇന്ത്യൻ മധ്യനിരയിലെ പ്രധാന താരങ്ങളിലൊരാളാണ്.

തിലക് വർമ്മയ്ക്ക് ലോകകപ്പ് നഷ്ടമായാൽ പകരം താരങ്ങളെ പരിഗണിക്കേണ്ടിവരും. ശുഭ്മാൻ ഗില്ലും ശ്രേയസ് അയ്യരും മധ്യനിരയിലേക്ക് തിരിച്ചെത്താൻ സാധ്യതയുള്ളവരുടെ പട്ടികയിലാണ്.