ഡിജിറ്റല് ദിര്ഹമിൻ്റെ ഇഷ്യു, സര്ക്കുലേഷന്, ഉപയോഗം എന്നിവയ്ക്കായി സെന്ട്രല് ബാങ്ക് ഒരു സുരക്ഷിത പ്ലാറ്റ്ഫോം വികസിപ്പിച്ചെടുത്തിട്ടുണ്ട്. അതില് ഒരു ഡിജിറ്റല് ദിര്ഹം വാലറ്റ് ഉള്പ്പെടുന്നു
ദുബായ്: ഒരു ആഗോള സാമ്പത്തിക കേന്ദ്രമെന്ന നിലയില് എമിറേറ്റ്സിൻ്റെ സ്ഥാനം ശക്തിപ്പെടുത്തുന്നതിനുള്ള നീക്കത്തിൻ്റെ ഭാഗമായി, യുഎഇ സെന്ട്രല് ബാങ്ക് (സിബിയുഎഇ) രാജ്യത്തിൻ്റെ ദേശീയ കറന്സിയായ ദിര്ഹമിന് ഒരു പുതിയ ചിഹ്നം പുറത്തിറക്കി. എമിറാത്തി ദിര്ഹാമിൻ്റെ സ്ഥിരതയെ പ്രതിനിധീകരിക്കുന്നതിനൊപ്പം രാജ്യത്തിൻ്റെ പതാകയോട് ചേര്ന്നു നില്ക്കുന്നതു കൂടിയാണ് പുതിയ ചിഹ്നം. ഡിജിറ്റല് ദിര്ഹമിനുള്ള ചിഹ്നവും സിബിയുഎഇ വെളിപ്പെടുത്തി. ദിര്ഹമിൻ്റെ ആദ്യ ഇംഗ്ലീഷ് അക്ഷരമായ ഡി ഉപയോഗിച്ചാണ് പുതിയ ചിഹ്നം രൂപപ്പെടുത്തിയിരിക്കുന്നത്. യുഎഇ പതാകയില് നിന്ന് പ്രചോദനം ഉള്ക്കൊണ്ട് യുഎഇ ദിര്ഹമിൻ്റെ സ്ഥിരതയെ പ്രതിനിധീകരിക്കുന്ന രണ്ട് തിരശ്ചീന രേഖകള് ഇത് ഉള്ക്കൊള്ളുന്നു.
എന്നാല് ഡിജിറ്റല് ദിര്ഹമിൻ്റെ ചിഹ്നത്തില് സാധാരണ കറന്സി ചിഹ്നത്തിന് ചുറ്റും ഒരു വൃത്തം ഉണ്ട്. ദേശീയ സ്വത്വവും അഭിമാനവും പ്രതിഫലിപ്പിക്കുന്നതിന് യുഎഇ പതാകയുടെ നിറങ്ങളും ഇതില് ഉപയോഗിച്ചിട്ടുണ്ട്. സെന്ട്രല് ബാങ്ക് ഡിജിറ്റല് കറന്സിയായ ഡിജിറ്റല് ദിര്ഹം റീട്ടെയില് മേഖലയില് ഈ വര്ഷത്തിൻ്റെ അവസാന പാദത്തില് നിലവില് വരുമെന്ന് പ്രതീക്ഷിക്കുന്നു. സര്ക്കാര് നല്കുന്ന കറന്സിയുടെ ഒരു ഡിജിറ്റല് രൂപമാണ് സിബിഡിസി. അവ ക്രിപ്റ്റോകറന്സികള്ക്ക് സമാനമാണ്, പക്ഷേ അവയുടെ മൂല്യം മോണിറ്ററി അതോറിറ്റി നിശ്ചയിക്കും. രാജ്യത്തിന്റെ സാധാരണ കറന്സിക്ക് തുല്യവുമാണത്. റീട്ടെയില്, സ്ഥാപന നിക്ഷേപകര്ക്കിടയില് ഒരു ആസ്തി വിഭാഗമായി ക്രിപ്റ്റോകറന്സികളുടെ വര്ദ്ധിച്ചുവരുന്ന ജനപ്രീതിയുടെ പശ്ചാത്തലത്തില്, ലോകമെമ്പാടുമുള്ള സെന്ട്രല് ബാങ്കുകള് ഡിജിറ്റല് കറന്സികളുടെ വികസനം പരിശോധിക്കുന്നു.
യുഎഇയുടെ ദേശീയ കറന്സിയുടെ പുതിയ ചിഹ്നം, അതിൻ്റെ ഭൗതിക രൂപത്തിലും ഡിജിറ്റല് രൂപത്തിലും അനാഛാദനം ചെയ്യുന്നതിലും ഡിജിറ്റല് ദിര്ഹം വാലറ്റിൻ്റെ രൂപകല്പ്പനയിലും ഞങ്ങള്ക്ക് അഭിമാനമുണ്ടെന്ന് സിബിയുഎഇ ഗവര്ണര് ഖാലിദ് മുഹമ്മദ് ബാലമ പറഞ്ഞു. ഡിജിറ്റല് ദിര്ഹം പരിപാടി നടപ്പിലാക്കുന്നതിലെ ഗണ്യമായ പുരോഗതിയും സിബിയുഎഇയുടെ ദര്ശനം സാക്ഷാത്കരിക്കുന്നതിലേക്കുള്ള ഒരു കുതിച്ചുചാട്ടവും ഇത് പ്രതിഫലിപ്പിക്കുന്നുവെന്നും അദ്ദേഹം അറിയിച്ചു.ബാങ്കുകള്, എക്സ്ചേഞ്ച് ഹൗസുകള്, ധനകാര്യ കമ്പനികള്, ഫിന്ടെക് കമ്പനികള് തുടങ്ങിയ ലൈസന്സുള്ള ധനകാര്യ സ്ഥാപനങ്ങള് വഴി വ്യക്തികള്ക്കും ബിസിനസുകള്ക്കും ഡിജിറ്റല് ദിര്ഹം നേടാന് കഴിയും. 2023-ല് സിബിയുഎഇ ആരംഭിച്ച ഫിനാന്ഷ്യല് ഇന്ഫ്രാസ്ട്രക്ചര് ട്രാന്സ്ഫോര്മേഷന് പ്രോഗ്രാമിന്റെ ഭാഗമായുള്ള ഒരു പ്രധാന സംരംഭമാണ് ഡിജിറ്റല് ദിര്ഹം. വ്യക്തികള്ക്കും ബിസിനസുകള്ക്കും എളുപ്പത്തില് ഉപയോഗിക്കാവുന്ന തരത്തിലാണ് ഡിജിറ്റൽ വാലറ്റ് രൂപകല്പ്പന ചെയ്തിരിക്കുന്നത്. റീട്ടെയില് വ്യാപാരം, മൊത്തവ്യാപാരം, അതിര്ത്തി കടന്നുള്ള പേയ്മെന്റുകള്, പണ കൈമാറ്റം, പിന്വലിക്കലുകള്, ടോപ്പ്-അപ്പുകള് എന്നിവയുള്പ്പെടെ നിരവധി സാമ്പത്തിക ഇടപാടുകള് ഇത് എളുപ്പമാക്കും.
