പത്മകുമാറിന്റെ ഫേസ്ബുക്ക് പോസ്റ്റും മാധ്യമങ്ങളോടുള്ള പ്രതികരണവും ഗുരുതര അച്ചടക്കലംഘനമെന്ന് വിലയിരുത്തല്
പത്തനംതിട്ട: സിപിഐഎം സംസ്ഥാന കമ്മിറ്റിയില് ഉള്പ്പെടുത്താത്തതില് അതൃപ്തി പരസ്യമാക്കിയ പത്തനംതിട്ടയിലെ മുതിര്ന്ന നേതാവ് എ പത്മകുമാറിനെതിരെ പാര്ട്ടി നടപടിക്ക് സാധ്യത. മറ്റന്നാള് ചേരുന്ന പത്തനംതിട്ട ജില്ലാ കമ്മിറ്റിയില് വിഷയം ചര്ച്ചയാകും. പത്മകുമാറിന്റെ ഫേസ്ബുക്ക് പോസ്റ്റും മാധ്യമങ്ങളോടുള്ള പ്രതികരണവും ഗുരുതര അച്ചടക്കലംഘനമെന്ന് വിലയിരുത്തല്. അതേസമയം, ഫേസ്ബുക്ക് പോസ്റ്റ് പിന്വലിച്ചത് സ്വന്തം തീരുമാനപ്രകാരമെന്നും സൂചനയുണ്ട്.
‘ചതിവ്, വഞ്ചന, അവഹേളനം, 52 വര്ഷത്തെ ബാക്കിപത്രം ലാല് സലാം’ എന്നാണ് സ്വന്തം ഫോട്ടോയോടൊപ്പം അദ്ദേഹം ഫേസ്ബുക്കില് സംസ്ഥാന സമിതിയില് പരിഗണിക്കാത്തതില് പ്രതിഷേധമറിയിച്ച് കുറിച്ചത്. എന്നാല് വിവാദമായതോടെ പോസ്റ്റ് പിന്വലിച്ചു. ഉച്ചവരെ സിപിഐഎം സംസ്ഥാന സമ്മേളന വേദിയില് സജീവമായിരുന്ന പി പത്മകുമാര് സംസ്ഥാന സമിതി അംഗങ്ങളുടെ പട്ടിക വന്നതോടെയാണ് കൊല്ലം വിട്ട് തിരുവനന്തപുരത്തേക്ക് യാത്ര തിരിച്ചത്.
