പാട്ന: കുപ്രസിദ്ധ ഗുണ്ടാ നേതാവ് ചന്ദൻ മിശ്രയുടെ കൊലപാതകത്തിൽ ബന്ധപ്പെട്ടു പ്രതികളും പോലീസും തമ്മിൽ നടന്ന ഏറ്റുമുട്ടലിൽ രണ്ട് പ്രതികൾക്ക് പരിക്കേറ്റു. ബീഹാർ എസ്.ടി.എഫ് യും ഭോജ്പൂർ പോലീസും ചേർന്നുള്ള സംയുക്ത ഓപ്പറേഷനിലാണ് ഇന്ന് പുലർച്ചെ അഞ്ച് മണിയോടെ നടന്ന ഏറ്റുമുട്ടൽ.Gang leader Chandan Mishra murdered; two accused injured in encounter
പ്രതികളായ ബൽവന്ത് കുമാർ സിംഗിനും രവി രഞ്ജൻ കുമാർ സിംഗിനുമാണ് ഏറ്റുമുട്ടലിൽ പരിക്കേറ്റത്. ഇരുവരെയും പോലീസ് കസ്റ്റഡിയിലെടുത്ത് ചികിത്സയ്ക്ക് ആശുപത്രിയിൽ പ്രവേശിപ്പിച്ചിട്ടുണ്ട്.
ജൂലൈ 17-നാണ് പാട്നയിലെ സ്വകാര്യ ആശുപത്രിയിൽ ചികിത്സയിൽ കഴിയുകയായിരുന്ന ചന്ദൻ മിശ്രയെ സംഘം ചേർന്ന് വെടിവെച്ച് കൊലപ്പെടുത്തിയത്. അഞ്ചംഗ സംഘം ആശുപത്രിയിലെ മുറിയിൽ കയറി ചന്ദനെ ലക്ഷ്യമാക്കി വെടിയുതിർക്കുകയായിരുന്നു. സംഭവത്തിൽ പോലീസ് മുമ്പ് അറസ്റ്റു ചെയ്ത ആറ് പ്രതികളിൽ തൗസീഫ് ബാദ്ഷാ, നിഷു ഖാൻ, അൽപന ദാസ് തുടങ്ങിയവർ ഉൾപ്പെടുന്നു.
ഇന്ന് പിടിയിലായ പ്രതികളെ ചോദ്യം ചെയ്തപ്പോഴാണ് ചന്ദൻ മിശ്രയുടെ കൊലപാതകത്തിൽ നേരിട്ട് പങ്കുണ്ടെന്ന് ഇവർ സമ്മതിച്ചത്. പ്രതികളുടെ പക്കൽ നിന്നു രണ്ട് തോക്കുകളും നാല് വെടിയുണ്ടകളും പോലീസ് പിടിച്ചെടുത്തു.
24 ക്രിമിനൽ കേസുകളിൽ പ്രതിയായിരുന്നു കൊല്ലപ്പെട്ട ചന്ദൻ മിശ്ര, ഇവയിൽ 12 എണ്ണം കൊലപാതക കേസുകളായിരുന്നു. ഭഗൽപൂർ ജയിലിൽ കഴിയുമ്പോൾ ഷേറു എന്ന ഗുണ്ടാനേതാവുമായി ഉണ്ടായിരുന്ന ശത്രുതയെ തുടർന്നാണ് ഈ കൊലപാതകമെന്നാണ് പോലീസിന്റെ പ്രാഥമിക നിഗമനം.
