ബില്ലിൻ്റെ അംഗീകാരത്തിന് പിന്നാലെ കേന്ദ്ര സർക്കാർ വിജ്ഞാപനം പുറത്ത് ഇറക്കി.
ന്യൂഡൽഹി: വഖഫ് നിയമ ഭേദഗതി ബില്ലിന് അംഗീകാരം. രാഷ്ട്രപതി ദൗപതി മുർമു ഒപ്പ് വെച്ചതോടെ ബിൽ നിയമമായി. ബില്ലിൻ്റെ അംഗീകാരത്തിന് പിന്നാലെ കേന്ദ്ര സർക്കാർ വിജ്ഞാപനം പുറത്ത് ഇറക്കി.
ഇക്കഴിഞ്ഞ രണ്ട്, മൂന്ന് ദിവസങ്ങളിലായിരുന്നു വഖഫ് ബില് ലോക്സഭയിലും രാജ്യസഭയിലും പാസാക്കിയത്. മണിക്കൂറുകള് നീണ്ട ചര്ച്ചകള്ക്കൊടുവിലായിരുന്നു നടപടി. ലോക്സഭയിലും രാജ്യസഭയിലും ബില്ലിനെതിരെ പ്രതിപക്ഷ അംഗങ്ങള് ആഞ്ഞടിച്ചു. ലോക്സഭയില് കെ രാധാകൃഷ്ണന്, കെ സി വേണുഗോപാല്, എന് കെ പ്രേമചന്ദ്രന്, ഗൗരവ് ഗോഗോയി, മുഹമ്മദ് ജാവേദ്, അസസുദ്ദീന് ഒവൈസി, കെ രാധാകൃഷ്ണന്, ഇ ടി മുഹമ്മദ് ബഷീര് അടക്കമുള്ളവര് ഭേദഗതികള് നിര്ദേശിച്ചു. ഇതിന് പിന്നാലെ വോട്ടെടുപ്പ് നടന്നു. 288 പേര് ബില്ലിനെ അനുകൂലിച്ചപ്പോള് 232 പേര് എതിര്ത്തു. തുടര്ന്ന് പ്രതിപക്ഷ എംപിമാര് ഉന്നയിച്ച ഭേദഗതികള് ശബ്ദവോട്ടോടെ തള്ളുകയും ബില് ലോക്സഭയില് പാസാക്കുകയുമായിരുന്നു.
