തിരുവനന്തപുരം: സ്‌കൂളുകളിലെ ബാക്ക് ബെഞ്ച് സംവിധാനം പുനപരിശോധിക്കാന്‍ വിദ്യാഭ്യാസ വകുപ്പ് നീക്കം തുടങ്ങി. ഇതിനായി വിദഗ്ധസമിതിയെ നിയമിക്കുമെന്ന് വിദ്യാഭ്യാസ മന്ത്രി അറിയിച്ചു. കുട്ടികളെ പിന്നോട്ടടിപ്പിക്കുന്ന നിലവിലെ സമീപനം മാറ്റേണ്ടതുണ്ടെന്ന് അദ്ദേഹം പറഞ്ഞു. വിഷയത്തില്‍ പൊതുസമൂഹത്തിന്റെ പിന്തുണ ആവശ്യമാണെന്നും മന്ത്രി വ്യക്തമാക്കി.Move to reform the backbench system
ഒരു വിദ്യാര്‍ഥിയുടെ ആത്മവിശ്വാസത്തെയും പഠനത്തില്‍ പ്രതിഫലിക്കാവുന്ന രീതിയിലായിരിക്കും ഈ സംരംഭം മുന്നോട്ട് നയിക്കപ്പെടുക. ഈ ആശയം കുട്ടികളുടെ മാനസികാരോഗ്യത്തെയും പഠനമാനദണ്ഡങ്ങളെയും പ്രതികൂലമായി ബാധിക്കരുതെന്ന് മന്ത്രി വി. ശിവന്‍കുട്ടി ഫേസ്ബുക്ക് കുറിപ്പില്‍ വ്യക്തമാക്കി.
ഫേസ്ബുക്ക് പോസ്റ്റിന്റെ പൂര്‍ണരൂപം…
പ്രിയപ്പെട്ടവരെ, നമ്മുടെ സ്‌കൂള്‍ ക്ലാസ് മുറികളില്‍നിന്ന് ‘പിന്‍ബെഞ്ചുകാര്‍’ എന്നൊരു സങ്കല്‍പ്പം ഒഴിവാക്കാന്‍ ആഗ്രഹിക്കുന്നു. ഈ സങ്കല്‍പം ഒരു വിദ്യാര്‍ഥിയുടെ ആത്മവിശ്വാസത്തെയും പഠനത്തെയും പ്രതികൂലമായി ബാധിക്കാന്‍ സാധ്യതയുണ്ട്.ഒരു കുട്ടിയും പഠനത്തിലോ ജീവിതത്തിലോ പിന്നോട്ട് പോകാന്‍ പാടില്ല. എല്ലാ കുട്ടികള്‍ക്കും തുല്യ അവസരങ്ങള്‍ ഉറപ്പാക്കുക എന്നതാണ് നമ്മുടെ ലക്ഷ്യം. ഇത് എങ്ങനെ പ്രാവര്‍ത്തികമാക്കാം എന്നതിനെക്കുറിച്ച് നമ്മള്‍ ആലോചിക്കുന്നു.
പിന്‍ബെഞ്ചുകാര്‍ എന്ന ആശയം ഇല്ലാതാക്കാന്‍ പല രാജ്യങ്ങളും പല മാതൃകകളും പിന്തുടരുന്നുണ്ട്. നമ്മുടെ വിദ്യാഭ്യാസരീതിക്ക് അനുയോജ്യമായ ഏറ്റവും മികച്ച മാതൃക കണ്ടെത്താന്‍ വിദഗ്ധരുടെ ഒരു സമിതിയെ നിയോഗിക്കാന്‍ തീരുമാനിച്ചു. ഈ സമിതിയുടെ നിര്‍ദ്ദേശങ്ങള്‍ പരിഗണിച്ച് നമുക്ക് മുന്നോട്ട് പോകാം.നമ്മുടെ കുട്ടികളുടെ മികച്ച ഭാവിക്കായി നിങ്ങളുടെ എല്ലാവിധ പിന്തുണയും തേടുന്നു.
