കണ്ണൂര്‍: കണ്ണൂര്‍ പഴയങ്ങാടിയില്‍ കുഞ്ഞിനൊപ്പം പുഴയില്‍ ചാടി ആത്മഹത്യ ചെയ്ത വയലപ്ര സ്വദേശിനി എം.വി. റീമയുടെ (30) ഭര്‍ത്താവ് കമല്‍രാജുമായി നടത്തിയ ഫോണ്‍ സംഭാഷണം പുറത്ത് വന്നിരിക്കുന്നു. ആത്മഹത്യയ്‌ക്ക് തൊട്ടുമുമ്പ് നടന്ന ഈ സംഭാഷണത്തില്‍ കുഞ്ഞിനെ തിരികെ നല്‍കണമെന്ന് കമല്‍രാജ് ആവശ്യം ഉന്നയിക്കുകയും റീമ കടുത്ത വേദനയും നിരാശയും പ്രകടിപ്പിക്കുകയും ചെയ്യുന്നു.Phone conversation of Reema, who died after jumping into the river, is out
അതേസമയം റീമയുടെ ആത്മഹത്യാകുറിപ്പടക്കം പുറത്ത് വന്നിരുന്നു. തന്റെയും മകന്റെയും മരണത്തിന് ഉത്തരവാദികൾ ഭർത്താവ് കമൽരാജും ഭർത്താവിന്റെ അമ്മ പ്രേമയുമാണെന്നാണ് കുറിപ്പിൽ പറയുന്നത്. അമ്മയുടെ വാക്ക് കേട്ട് ഭർത്താവ് തന്നെയും മകനെയും വീട്ടിൽ നിന്ന് ഇറക്കി വിട്ടതായും കുറിപ്പിൽ പറയുന്നുണ്ട്. ഭർത്താവിന്റെ അമ്മ നിരന്തരം തന്നെ മാനസികമായി പീഡിപ്പിച്ചിരുന്നതായും കുട്ടിക്ക് വേണ്ടി തന്നോട് ചാകാൻ പറഞ്ഞുവെന്നും റീമയുടെ ആത്മഹത്യാക്കുറിപ്പിൽ വ്യക്തമാക്കുന്നുണ്ട്.
“ഈ നാട്ടില്‍ പെണ്‍കുട്ടികള്‍ക്ക് നീതിയില്ല. നിയമവ്യവസ്ഥയിലും വിശ്വാസമില്ല” എന്നത് ആത്മഹത്യാക്കുറിപ്പിന്റെ ഏറ്റവും ദു:ഖകരമായ വരികളിലൊന്നാണ്.
റീമയുടെ അച്ഛന്‍ മോഹനനും ആകെയുള്ള ആരോപണങ്ങള്‍ ശരിവെക്കുന്നു. വിവാഹത്തിനുശേഷം മകളും കൊച്ചുമകനും എപ്പോഴും പീഡനത്തിനും വിധേയരായിരുന്നു എന്നാണ് മോഹനന്‍ പറയുന്നത്. ഗള്‍ഫില്‍നിന്ന് മടങ്ങിയ കമല്‍രാജ് കുട്ടിയെ തിരികെ ആവശ്യപ്പെട്ട് ഭീഷണിപ്പെടുത്തിയതോടെയാണ് റീമ കടുംകൈ ചെയ്തത്.
ശനിയാഴ്ച രാത്രി 12.45ന് ചെമ്പല്ലിക്കുണ്ട് പാലത്തില്‍ എത്തിച്ചേര്‍ന്ന റീമ തന്റെ രണ്ടര വയസ്സുകാരനായ മകന്‍ കൃശിവിനെക്കൊണ്ട് പുഴയിലേക്ക് ചാടുകയായിരുന്നു. രാത്രി തന്നെ തിരച്ചില്‍ ആരംഭിച്ചെങ്കിലും, ഞായറാഴ്ച രാവിലെയാണ് റീമയുടെ മൃതദേഹം കണ്ടെത്തിയത്. പിന്നീട് നടത്തിയ തിരച്ചിലിലാണ് കുട്ടിയുടെ മൃതദേഹവും കണ്ടെത്തുന്നത്.
