ഗസ്സ: ഗസ്സ സിറ്റിയിൽ മാധ്യമപ്രവർത്തകരെ പാർപ്പിച്ചിരുന്ന ടെന്റിന് നേരെയുണ്ടായ ഇസ്രായേൽ ആക്രമണത്തിൽ, അൽ ജസീറ റിപ്പോർട്ടർ അനസ് അൽ ഷെരീഫ് അടക്കം അഞ്ച് മാധ്യമപ്രവർത്തകർ കൊല്ലപ്പെട്ടു. ഞായറാഴ്ച വൈകുന്നേരം അൽ-ഷിഫ ആശുപത്രിയുടെ പ്രധാന ഗേറ്റിന് പുറത്തുവച്ച ടെന്റിലേക്കുള്ള ആക്രമണത്തിൽ ആകെ ഏഴ് പേർ ജീവൻ നഷ്ടപ്പെടുത്തി.Israeli attack on Gaza: 5 journalists including Al Jazeera reporter killed
28 കാരനായ അനസ്, കൊല്ലപ്പെടുന്നതിന് തൊട്ടുമുമ്പ് വടക്കൻ ഗസ്സയിലെ ഇസ്രായേൽ ആക്രമണങ്ങളെക്കുറിച്ച് റിപ്പോർട്ട് ചെയ്യുകയായിരുന്നു. അദ്ദേഹത്തിന്റെ അവസാന വീഡിയോയിൽ, ഇരുണ്ട ആകാശം ഇസ്രായേൽ മിസൈൽ ബോംബാക്രമണത്തിൽ ഓറഞ്ച് വെളിച്ചത്തിൽ തെളിയുന്നതും അതിന്റെ മുഴക്കം പശ്ചാത്തലത്തിൽ മുഴങ്ങുന്നതും കാണാം.
അനസിനൊപ്പം അൽ ജസീറ മാധ്യമപ്രവർത്തകരായ മുഹമ്മദ് ഖ്രീഖെ, ഇബ്രാഹിം സഹെർ, മുഹമ്മദ് നൗഫൽ, മോമെൻ അലിവ എന്നിവരും ആക്രമണത്തിൽ കൊല്ലപ്പെട്ടു. 5 ലക്ഷത്തിലധികം ഫോളോവേഴ്‌സ് ഉണ്ടായിരുന്ന അനസിന്റെ ‘എക്സ്’ അക്കൗണ്ടിൽ, മരണത്തിന് മിനിറ്റുകൾ മുൻപ് വരെ ഇസ്രായേൽ ബോംബാക്രമണങ്ങളെ കുറിച്ച് പോസ്റ്റുകൾ ഉണ്ടായിരുന്നു.
അനസ് ഹമാസ് അംഗമായിരുന്നുവെന്നും ഇസ്രായേലിനെതിരെ റോക്കറ്റ് ആക്രമണം നടത്തിയെന്നുമുള്ള ആരോപണം ഉയർത്തി, അദ്ദേഹത്തെ വധിച്ചതായി ഇസ്രായേൽ പ്രസ്താവിച്ചു. എന്നാൽ, വിശ്വസനീയമായ തെളിവുകൾ നൽകാതെ മാധ്യമപ്രവർത്തകരെ ‘തീവ്രവാദികൾ’ എന്ന് മുദ്രകുത്തുന്ന ഇസ്രായേലിന്റെ രീതി, പത്രസ്വാതന്ത്ര്യത്തോടുള്ള അവരുടെ സമീപനത്തെക്കുറിച്ച് ഗുരുതരമായ ചോദ്യങ്ങൾ ഉയർത്തുന്നതായി കമ്മറ്റി ടു പ്രൊട്ടക്ട് ജേർണലിസ്റ്റ്സിന്റെ മിഡിൽ ഈസ്റ്റ്-നോർത്ത് ആഫ്രിക്ക ഡയറക്ടർ സാറ ഖുദ വിമർശിച്ചു.
“ഗസ്സയിലെ ദുരന്ത യാഥാർത്ഥ്യം ലോകത്തിന് മുന്നിൽ എത്തിച്ച ധീര ശബ്ദങ്ങളിൽ അനസ് അൽ ഷെരീഫും സഹപ്രവർത്തകരും ഉൾപ്പെടുന്നു. ഇത് പത്രസ്വാതന്ത്ര്യത്തിന് നേരെയുള്ള നഗ്നവും ആസൂത്രിതവുമായ ആക്രമണമാണ്,” എന്ന് അൽ ജസീറ പ്രസ്താവനയിൽ വ്യക്തമാക്കി. ഗസ്സയിലെ റിപ്പോർട്ടുകൾ മൂലം അനസിന്റെ ജീവൻ അപകടത്തിലാണെന്ന് പത്രസ്വാതന്ത്ര്യ സംഘടനകളും യുഎൻ വിദഗ്ധരും നേരത്തെ മുന്നറിയിപ്പ് നൽകിയിരുന്നു.
