ആരോഗ്യ ജാഗ്രതാ കലണ്ടര് പ്രകാരമുള്ള പ്രതിരോധ പ്രവര്ത്തനങ്ങള് കൃത്യമായി നടത്തണം. കൊതുകിൻ്റെ ഉറവിട നശീകരണം പ്രത്യേകം ശ്രദ്ധിക്കണമെന്നും മന്ത്രിയുടെ മുന്നറിയിപ്പ്
തിരുവനന്തപുരം: വേനല്ക്കാലത്ത് അമീബിക്ക് മസ്തിഷ്ക ജ്വരത്തിനെതിരെ (അമീബിക്ക് മെനിഞ്ചോഎന്സെഫലൈറ്റിസ്) ജാഗ്രത പാലിക്കണമെന്ന് ആരോഗ്യ മന്ത്രി വീണാ ജോർജ്. ജലാശയങ്ങളില് കുളിക്കുന്നവര് പ്രത്യേകം ശ്രദ്ധിക്കണം. പകര്ച്ചവ്യാധി പ്രതിരോധത്തിന് തദ്ദേശ സ്ഥാപനങ്ങളുമായി സഹകരിച്ച് പ്രാദേശിക പ്രതിരോധ പദ്ധതി തയ്യാറാക്കുമെന്നും മന്ത്രി പറഞ്ഞു.ഓരോ തദ്ദേശ സ്ഥാപന തലത്തിലും പ്രതിരോധ പദ്ധതി തയ്യാറാക്കും. മുന് വര്ഷങ്ങളിലെ പകര്ച്ചവ്യാധികളുടെ കണക്കുകള് പരിശോധിച്ച് ഹോട്ട് സ്പോട്ടുകള് കണ്ടെത്തി വിശകലനം നടത്തി പ്രതിരോധം ശക്തമാക്കും. ഈ ഹോട്ട് സ്പോട്ടുകളില് പ്രാദേശികമായ പ്രതിരോധ പദ്ധതികള് ആവിഷ്ക്കരിക്കുകയും തദ്ദേശ സ്ഥാപനങ്ങളുടെ സഹായത്തോടെ കര്മ്മപദ്ധതി നടപ്പിലാക്കുകയും ചെയ്യും. ഇതിലൂടെ പ്രാദേശികമായി തന്നെ പകര്ച്ചവ്യാധികളെ പ്രതിരോധിക്കാനാകുമെന്നും മന്ത്രി പറഞ്ഞു.
വേനല്ക്കാലമായതിനാല് അമീബിക്ക് മസ്തിഷ്ക ജ്വരത്തിനെതിരെ ജാഗ്രതയുണ്ടാകണം. ജലാശയങ്ങളില് കുളിക്കുന്നവര് ശ്രദ്ധിക്കണം. വാട്ടര് ടാങ്കുകള് ചെളി കെട്ടിക്കിടക്കാതെ വൃത്തിയാക്കണം. സ്വിമ്മിങ് പൂളുകള്, അമ്യൂസ്മെൻ്റ് പാര്ക്കുകള് എന്നിവിടങ്ങളിലെ വെള്ളം ക്ലോറിനേറ്റ് ചെയ്ത് ശുദ്ധമാക്കണം. ഇത്തരം ജലവുമായി ഏതെങ്കിലും രീതിയില് സമ്പര്ക്കം ഉണ്ടായിട്ടുള്ളവര്ക്ക് തീവ്രമായ തലവേദന, പനി, ഓക്കാനം, ഛര്ദി, കഴുത്ത് തിരിക്കാനുള്ള ബുദ്ധിമുട്ട് തുടങ്ങിയ രോഗലക്ഷണങ്ങള് കണ്ടാല് ഉടനടി അക്കാര്യം പറഞ്ഞ് ചികിത്സ തേടണം.97 ശതമാനം മരണ നിരക്കുള്ള രോഗമാണ്. അമീബിക്ക് മസ്തിഷ്ക ജ്വരം. അതുകൊണ്ട് തന്നെ തുടക്കത്തിൽ തന്നെ രോഗം കണ്ടെത്തി ചികിത്സിക്കുന്നത് പ്രധാനമാണ്. മസ്തിഷ്ക ജ്വരം സംശയിക്കുന്നവരില് അമീബിക്ക് മസ്തിഷ്ക ജ്വരം നിര്ണയിക്കാനുള്ള പരിശോധന കൂടി നടത്താനും മന്ത്രി നിര്ദേശം നല്കിയിട്ടുണ്ട്.
സംസ്ഥാനത്ത് ചൂട് വര്ധിക്കുന്ന സാഹചര്യത്തില് കൂടുതൽ ജാഗ്രത പാലിക്കേണ്ടതുണ്ട്. ഇടവിട്ടുള്ള മഴ കാരണം ഡെങ്കിപ്പനി, എലിപ്പനി, ചിക്കന്ഗുനിയ എന്നിവയ്ക്കെതിരേയും ശ്രദ്ധ വേണം. ഹെപ്പറ്റൈറ്റിസ് എ, മലേറിയ, എച്ച്1 എന്1 തുടങ്ങിയ രോഗങ്ങളും പൊതുവായി റിപ്പോര്ട്ട് ചെയ്യുന്നുണ്ട്. ജലജന്യ രോഗങ്ങള്ക്കെതിരെ ജാഗ്രത പാലിക്കണം. തിളപ്പിച്ചാറ്റിയ വെള്ളം മാത്രമേ കുടിക്കാന് പാടുള്ളൂ. കുടിവെള്ള സ്രോതസുകള് കൃത്യമായി ക്ലോറിനേറ്റ് ചെയ്യണം. നിപ പ്രതിരോധ പ്രവര്ത്തനങ്ങള് നടത്താനും മന്ത്രി നിര്ദേശം നല്കി.തദ്ദേശ സ്വയംഭരണ സ്ഥാപനങ്ങളുമായി ചേര്ന്ന് മഴക്കാല പൂര്വ ശുചീകരണ പ്രവര്ത്തനങ്ങള് ശക്തമാക്കാനും മന്ത്രി നിര്ദേശം നല്കി. സ്റ്റേറ്റ് ലെവല് റാപ്പിഡ് റെസ്പോണ്സ് ടീം (ആര്ആര്ടി) യോഗത്തിലാണ് മന്ത്രി വീണാ ജോർജ് നിര്ദേശം നല്കിയത്.
