കൊച്ചി: എറണാകുളം മഹാരാജാസ് കോളജിലെ പഴയ വിദ്യാര്‍ത്ഥിയായ മെഗാസ്റ്റാര്‍ മമ്മൂട്ടിയുടെ അഭിനയ ജീവിതം ഇനി പഠനവിഷയമായി കോളജ് വിദ്യാര്‍ത്ഥികള്‍ പഠിക്കും. ബിഎ ചരിത്ര രണ്ടാം വര്‍ഷത്തിലെ മേജര്‍ ഇലക്ടീവായ “മലയാള സിനിമയുടെ ചരിത്രം” എന്ന വിഷയത്തിലാണ് മമ്മൂട്ടിയുടെ സംഭാവനകള്‍ ഉള്‍പ്പെടുത്തിയിരിക്കുന്നത്. കോളജിന്റെ ബോര്‍ഡ് ഓഫ് സ്റ്റഡീസാണ് ഈ മാറ്റങ്ങള്‍ക്ക് അംഗീകാരം നല്‍കിയത്.Mammootty and Dakshayani Velayudhan’s life in college syllabus
മൂന്ന് ദേശീയ അവാര്‍ഡുകള്‍ ഉള്‍പ്പെടെ നിരവധി അംഗീകാരങ്ങള്‍ നേടിയ മമ്മൂട്ടി മലയാള സിനിമയ്ക്ക് നല്‍കിയ വലിയ സംഭാവനകളാണ് പാഠ്യവിഷയത്തിന്റെ ഭാഗമായി അവതരിപ്പിക്കുന്നത്. മഹാരാജാസ് കോളജുമായുള്ള അദ്ദേഹത്തിന്റെ അടുത്ത ബന്ധം, പൂര്‍വ്വ വിദ്യാര്‍ത്ഥി സംഗമങ്ങളില്‍ സജീവ പങ്കാളിത്തം, വിദ്യാര്‍ഥിദിനങ്ങളിലെ നാടക-കഥാപ്രസംഗങ്ങൾ എന്നിവയൊക്കെ പാഠ്യത്തിൽ ഉൾപ്പെടുന്നു.
അതുപോലെ തന്നെ, മഹാരാജാസ് കോളജിന്റെ മറ്റൊരു പ്രഗല്‍ഭ പൂര്‍വ്വ വിദ്യാര്‍ത്ഥിയും ഭരണഘടനാ നിര്‍മ്മാണ സഭയിലെ ആദ്യ ദലിത് വനിതാ അംഗവുമായ ദാക്ഷായണി വേലായുധന്റെയും ജീവിതം ഇനി ബിഎ ഓണേഴ്‌സ് ഒന്നാം വര്‍ഷ ചരിത്രവിഷയത്തില്‍ പഠിക്കും. പട്ടികജാതിക്കാരില്‍ നിന്നുള്ള ആദ്യ ബിരുദധാരിണിയായിരുന്നു ദാക്ഷായണി.
തപസ്വിനിയമ്മ, പ്രൊഫസര്‍ പി.എസ്. വേലായുധന്‍ തുടങ്ങിയ മഹാരാജാസ് കോളജിന്റെ ചരിത്രത്തിലേതായ മറ്റ് പ്രധാന വ്യക്തിത്വങ്ങളും പുതിയ സിലബസില്‍ ഉള്‍പ്പെടുത്തുന്നുണ്ട്. 2025-26 അധ്യയന വര്‍ഷം പ്രാബല്യത്തില്‍ വരാനിരിക്കുന്ന പുതിയ പാഠ്യപദ്ധതിയിലൂടെയാണ് ഈ പരിഷ്‌കരണങ്ങള്‍.
ഈ നീക്കങ്ങള്‍ ചരിത്രവിഷയത്തിന്‍റെ പ്രാദേശിക ഘടകങ്ങളെ വിപുലീകരിക്കുകയും, സാമൂഹിക പുരോഗതിക്കും സാംസ്‌കാരിക മാറ്റങ്ങള്‍ക്കും സംഭാവന നല്‍കിയ വ്യക്തികളെ അനുസ്മരിപ്പിക്കുകയും ചെയ്യുന്നതാണ്.
