നിയമസഭയില് പ്രതിപക്ഷ നേതാവ് രമേശ് ചെന്നിത്തല അവതരിപ്പിച്ച അടിയന്തര പ്രമേയത്തിന് മേലെയുള്ള ചര്ച്ചയില് ഭരണ-പ്രതിപക്ഷ വാക്പോര്. സ്കൂളുകളില് ലഹരിയും ആക്രമണവും വ്യാപിക്കുന്നുവെന്ന് രമേശ് ചെന്നിത്തല പറഞ്ഞു. അക്രമങ്ങള്ക്ക് പിന്നില് ലഹരിയാണെന്നും കേരളം നീരാളി പിടുത്തത്തിലാണെന്നും രമേശ് ചെന്നിത്തല പറഞ്ഞു.
‘മിസ്റ്റര് ചീഫ് മിനിസ്റ്റര്’ എന്ന് അഭിസംബോധന ചെയ്താണ് രമേശ് ചെന്നിത്തല സംസാരിച്ചത്.രാസ ലഹരിയില് മൂല്യബോധം നഷ്ടപ്പെട്ടവര് എന്ത് ക്രൂരതയും ചെയ്യും. സമൂഹം ഗൗരവമായി ചിന്തിക്കേണ്ട വിഷയമാണിത്. മയക്കുമരുന്ന് കുട്ടികളുടെ ജീവിതത്തെ തകര്ക്കുന്നു. നമ്മുടെ യുവത്വം പുകഞ്ഞ് ഇല്ലാതാകുന്നു. അക്രമങ്ങളും കൊലപാതകങ്ങളും വര്ദ്ധിച്ചു. ലഹരിയെ നിയന്ത്രിക്കാന് സര്ക്കാറിന് കഴിഞ്ഞിട്ടില്ല. സര്ക്കാര് ഇതിന് മുന്നിട്ടിറങ്ങണം’, രമേശ് ചെന്നിത്തല പറഞ്ഞു.വിമുക്തി പരാജയപ്പെട്ട പദ്ധതിയായി മാറിയെന്നും സര്ക്കാരിന്റെ വിമുക്തി പദ്ധതി പരാജയമാണെന്നും അദ്ദേഹം പറഞ്ഞു.
കേരളം ലഹരി മാഫിയയുടെ പിടിയിലമരുമ്പോഴാണ് ഡിസ്ലറിയും ബ്രൂവറിയും സര്ക്കാര് കൊണ്ട് വരുന്നതെന്നും അദ്ദേഹം ചൂണ്ടിക്കാട്ടി. കലാലയങ്ങളില് റാഗിംഗ് വ്യാപകമാണെന്നും നേതൃത്വം നല്കുന്നത് എസ്എഫ്ഐയാണെന്നും രമേശ് ചെന്നിത്തല പറഞ്ഞു.സിദ്ധാര്ത്ഥനെ കൊലപ്പെടുത്തിയത് ആരാണ്. 51 വെട്ടില് ടി പി ചന്ദ്രശേഖരനെ കൊലപ്പെടുത്തിയപ്പോള് കേരളം നടുങ്ങിയതാണ്.
എന്നാല് രമേശ് ചെന്നിത്തലയുടെ പ്രസംഗത്തിനെതിരെ മന്ത്രി എം ബി രാജേഷ് പ്രതികരിച്ചു. സങ്കുചിതമായ രാഷ്ട്രീയ ലക്ഷ്യംവെച്ച് അപകടത്തിലേക്ക് കൊണ്ടുപോകുന്നുവെന്ന് അദ്ദേഹം കുറ്റപ്പെടുത്തി. അടിയന്തര പ്രമേയത്തെ തുറന്ന മനസോടെയാണ് കണ്ടത്. ചെന്നിത്തല രാഷ്ട്രീയ ലാഭം കൊയ്യാന് ശ്രമിക്കുന്നുവെന്നും അദ്ദേഹം പറഞ്ഞു.
നിയമസഭയില് മുഖ്യമന്ത്രിയും ക്ഷുഭിതനായി. നാടിന്റെ പ്രശ്നം എന്താണെന്ന് മനസ്സിലാക്കണമെന്ന് മുഖ്യമന്ത്രി പറഞ്ഞു. മിസ്റ്റര് ചീഫ് മിനിസ്റ്റര് എന്ന് ഇടയ്ക്കിടെ പറയുന്നതെന്തിനാണെന്നും അദ്ദേഹം ചോദിച്ചു.
മിസ്റ്റര് ചീഫ് മിനിസ്റ്റര് എന്ന വിളിക്കുന്നതില് എന്താണ് തെറ്റെന്ന് തിരിച്ച് ചോദിച്ച ചെന്നിത്തല കൂട്ടക്കൊലപാതകങ്ങളും ലഹരി വ്യാപനവും തടയുന്നതില് സര്ക്കാര് പരാജയപ്പെട്ടുവെന്ന് പറഞ്ഞു. യുഡിഎഫ് സര്ക്കാര് ലഹരി മാഫിയ അടിച്ചമര്ത്തിയിട്ടുണ്ട്. കഴിഞ്ഞ 9 വര്ഷക്കാലം സര്ക്കാര് എവിടെയായിരുന്നു. അക്രമകാരികള്ക്ക് സര്ക്കാര് പ്രോത്സാഹനം നല്കരുത്. സര്ക്കാര് ലഹരി മാഫിയയെ അടിച്ചമര്ത്തണം. അങ്ങനെയെങ്കില് പ്രതിപക്ഷത്തിന്റെ പിന്തുണ ഉണ്ടാകുമെന്നും ചെന്നിത്തല വ്യക്തമാക്കി.
