കോഴിക്കോട്: താമരശ്ശേരിയില് ക്രൂരമര്ദനത്തിന് ഇരയായി കൊല്ലപ്പെട്ട പത്താംക്ലാസ് വിദ്യാര്ഥി ഷഹബാസിന്റെ മരണത്തില് പ്രതികളായ കുട്ടികളുടെ ജാമ്യാപേക്ഷ തള്ളി. ജാമ്യാപേക്ഷ തള്ളിയ അഞ്ച് വിദ്യാര്ഥികളെയും ദുര്ഗുണ പരിഹാര പാഠശാലയിലേക്ക് അയക്കും. വിദ്യാര്ഥികള്ക്ക് പരീക്ഷയെഴുതാൻ അവസരം നല്കും.
സംഘർഷത്തിൽ പരിക്കേറ്റ ഷഹബാസ് കോഴിക്കോട് മെഡിക്കല് കോളേജ് ആശുപത്രിയില് തീവ്ര പരിചരണ വിഭാഗത്തില് ചികിത്സയിലിരിക്കേ 12.30 ഓടെയാണ് മരണപ്പെട്ടത്. എളേറ്റില് വട്ടോളി എം ജെ ഹയര് സെക്കന്ററി സ്കൂളിലെ കുട്ടികളും താമരശ്ശേരി ഹയര് സെക്കന്ററി സ്കൂളിലെ കുട്ടികളുമാണ് ട്യൂഷന് ക്ലാസിലെ ഫെയര്വെല് പാര്ട്ടിക്കിടെ മൈക്ക് ഓഫ് ആയതുമായി ബന്ധപ്പെട്ട പരസ്പരം ഏറ്റുമുട്ടിയത്. കരാട്ടെ പരിശീലിക്കുന്നവര് ഉപയോഗിക്കുന്ന നഞ്ചക്ക് ഉപയോഗിച്ചാണ് പ്രതികള് ഷഹബാസിനെ മര്ദിച്ചത്.
ഷഹബാസിന്റെ മരണത്തില് സംസ്ഥാന ബാലാവകാശ കമ്മീഷന് സ്വമേധയാ കേസെടുത്തിരുന്നു. ജില്ലാ പൊലീസ് മേധാവിയോടും ശിശുക്ഷേമ സമിതി ചെയര്പേഴ്സണോടും ബാലാവകാശ കമ്മീഷന് ചെയര്പേഴ്സണ് വിശദീകരണം തേടി.
