വീടിന് 200 മീറ്റർ അകലെയുള്ള കാട്ടിലെ മരത്തിൽ കഴുത്തില് കുരുക്കിട്ട് തൂങ്ങിയ നിലയിലാണ് മൃതദേഹങ്ങള് ഉണ്ടായിരുന്നത്. 26 ദിവസങ്ങള്ക്ക് മുന്പായിരുന്നു പെണ്കുട്ടിയേയും 42കാരനായ പ്രദീപിനേയും കാണാതായത്
കാസർകോട്: പൈവളിഗയിൽ മരിച്ച നിലയിൽ കണ്ടെത്തിയ പത്താം ക്ലാസ് വിദ്യാർത്ഥിനിയുടെയും അയൽവാസിയുടെയും മൃതദേഹങ്ങൾ പോസ്റ്റ്മോർട്ടത്തിന് ശേഷം ഇന്ന് സംസ്കരിക്കും. രാവിലെ പരിയാരം മെഡിക്കൽ കോളേജ് ആശുപത്രിയിലാണ് പോസ്റ്റ്മോർട്ടം നടക്കുക. പൊലീസും നാട്ടുകാരും ചേർന്ന് നടത്തിയ തിരച്ചിലിൽ വീടിന് സമീപത്തെ വനപ്രദേശത്ത് നിന്ന് തൂങ്ങിയ നിലയിലാണ് ഇന്നലെ പതിനഞ്ചുകാരിയെയും അയൽവാസിയായ പ്രദീപിനെയും മരിച്ചനിലയിൽ കണ്ടെത്തിയത്. വീടിന് 200 മീറ്റർ അകലെയുള്ള കാട്ടിലെ മരത്തിൽ കഴുത്തില് കുരുക്കിട്ട് തൂങ്ങിയ നിലയിലാണ് മൃതദേഹങ്ങള് ഉണ്ടായിരുന്നത്. 26 ദിവസങ്ങള്ക്ക് മുന്പായിരുന്നു പെണ്കുട്ടിയേയും 42കാരനായ പ്രദീപിനേയും കാണാതായത്. ഇരുവരും നാടുവിട്ടതായാണ് ആദ്യം കരുതിയിരുന്നത്. തുടർന്ന് പെൺകുട്ടിയുടെ മൊബൈൽ ഫോണിന്റെ ടവർ ലൊക്കേഷൻ കേന്ദ്രീകരിച്ച് പൊലീസ് നടത്തിയ അന്വേഷണത്തിലാണ് മൃതദേഹങ്ങൾ കണ്ടെത്തിയത്.
ഇക്കഴിഞ്ഞ ഫെബ്രുവരി പന്ത്രണ്ടിനായിരുന്നു തങ്ങള് ഉറക്കമുണര്ന്നപ്പോള് മകള് വീട്ടില് ഉണ്ടായിരുന്നില്ലെന്ന് പറഞ്ഞ് പിതാവ് പൊലീസിൽ പരാതി നല്കിയത്. ഇതിന്റെ അടിസ്ഥാനത്തില് പൊലീസ് നടത്തിയ അന്വേഷണത്തില് ഫെബ്രുവരി പന്ത്രണ്ടിന് പുലര്ച്ചെ മൂന്നരയോടെ പെണ്കുട്ടിയെ കാണാതായിയെന്നും മൊബൈല് ഫോണ് മാത്രമായിരുന്നു പെണ്കുട്ടിയുടെ കൈവശമുണ്ടായിരുന്നതെന്നും പൊലീസ് കണ്ടെത്തി. തുടര്ന്ന് നടത്തിയ അന്വേഷണത്തിലാണ് സമീപവാസിയായ പ്രദീപിനേയും ഇതേദിവസം തന്നെ കാണാതായി എന്നകാര്യവും കണ്ടെത്തുന്നത്. പെണ്കുട്ടിയുടെ കുടുംബം കോടതിയില് ഹേബിയസ് കോര്പസ് ഹര്ജി ഫയല് ചെയ്തതോടെയാണ് അന്വേഷണം ഊര്ജിതമായത്.
