കൊച്ചി: വാളയാറില് മരിച്ച പെണ്കുട്ടികളുടെ മാതാപിതാക്കളെ കൂടുതല് കേസുകളില് പ്രതിചേര്ത്ത് സിബിഐ. നേരത്തെ ആറ് കേസുകളില് ഇവരെ പ്രതിയാക്കി കുറ്റപത്രം നല്കിയിരുന്നു. ഈ കേസുകളിലെല്ലാം ഇരുവര്ക്കുമെതിരെ സാക്ഷിമൊഴികളും രേഖകളും ശാസ്ത്രീയ തെളിവുകളുമെല്ലാമുണ്ടെന്ന് ബുധനാഴ്ച കേസ് പരിഗണിക്കവെ സിബിഐ ചൂണ്ടിക്കാട്ടി. ഇരുവര്ക്കും സമന്സ് അയക്കുന്നതിനുള്ള നടപടിക്രമം മാർച്ച് 25ന് സിബിഐ കോടതി പരിഗണിക്കും.
മാതാപിതാക്കളെ പ്രതി ചേര്ത്ത് സിബിഐ നല്കിയ കുറ്റപത്രം അംഗീകരിക്കരുതെന്ന് മാതാപിതാക്കളുടെ അഭിഭാഷകന് കോടതിയില് ആവശ്യപ്പെട്ടു. എന്നാല് കുറ്റപത്രം അംഗീകരിക്കുന്നതില് തീരുമാനമെടുത്ത് സമന്സ് അയച്ച ശേഷം മാതാപിതാക്കളുടെ വാദം കേള്ക്കാമെന്ന് എറണാകുളം പ്രത്യേക സിബിഐ കോടതി അറിയിച്ചിരിക്കുന്നു . സിബിഐ നല്കിയ കുറ്റപത്രങ്ങള് അനുസരിച്ച് ആറ് കേസുകളിലും അമ്മ രണ്ടാം പ്രതിയും അച്ഛന് മൂന്നാം പ്രതിയുമാണ്.
