മോഹന്‍ലാല്‍, പൃഥ്വിരാജ് ആരാധകര്‍ അക്ഷമയോടെ കാത്തിരിക്കുന്ന ചിത്രമാണ് ‘എമ്പുരാന്’. ചിത്രം റിലീസിനോടടുക്കുമ്പോള്‍ സിനിമയുടെ പ്രൊമോഷണല്‍ പരിപാടികളുടെ തിരക്കിലാണ് അണിയറപ്രവര്‍ത്തകരും താരങ്ങളും. ‘എമ്പുരാന്’ റിലീസിന് മുന്നോടിയായി സിനിമയുടെ ആദ്യ ഭാഗമായ ‘ലൂസിഫര്‍’ ഒരിക്കല്‍ കൂടി തിയേറ്ററുകളില്‍ എത്തിക്കാനുള്ള ഒരുക്കത്തിലാണ് അണിയറപ്രവര്‍ത്തകര്‍. എമ്പുരാന് മുൻപ് ലൂസിഫർ റീ റിലീസ് ചെയ്യാൻ ആഗ്രഹമുണ്ടെന്നും എന്നാൽ അതിൽ തീരുമാനമൊന്നും ആയിട്ടില്ലെന്നും ആന്റണി പെരുമ്പാവൂർ പറഞ്ഞിരിക്കുകയാണ്. അജയന്റെ രണ്ടാം മോഷണം എന്ന ടൊവിനോ സിനിമയുടെ സക്സസ് മീറ്റിലാണ് ആന്റണി പെരുമ്പാവൂർ ഇക്കാര്യം പറഞ്ഞത്. ‘ലൂസിഫർ വീണ്ടും റിലീസ് ചെയ്യണമെന്ന് ആഗ്രഹിക്കുന്നുണ്ട്. “ലൂസിഫര്‍ വീണ്ടും റിലീസ് ചെയ്യണമെന്ന് ആഗ്രഹിക്കുന്നുണ്ട്. തിയേറ്ററില്‍ രണ്ടാഴ്‌ച്ച പ്രദര്‍ശിപ്പിക്കണം. അത് കണ്ട ശേഷം എമ്പുരാന് റിലീസ് ചെയ്യണമെന്ന ആഗ്രഹം മനസ്സിലുണ്ട്. കൂടുതല്‍ ഒന്നും തീരുമാനിച്ചിട്ടില്ല,” ആന്റണി പെരുമ്പാവൂര്‍ പറഞ്ഞു. സ്റ്റീഫൻ നെടുമ്പള്ളി എന്ന കഥാപാത്രമായി മോഹൻലാൽ നിറഞ്ഞാടിയ ലൂസിഫർ 2019ൽ ആണ് റിലീസ് ചെയ്തത്. ചിത്രത്തിൽ പൃഥ്വിരാജ് സുകുമാരൻ, വിവേക് ഒബ്റോയ്, മഞ്ജു വാര്യർ, ടൊവിനോ തോമസ്, ഇന്ദ്രജിത്ത് സുകുമാരൻ തുടങ്ങി ഒട്ടനവധി താരങ്ങൾ അണിനിരന്നു. അതേസമയം, എമ്പുരാന് പാന്‍ ഇന്ത്യന്‍ റിലീസായാണ് തിയേറ്ററുകളില്‍ എത്തുന്നത്. ലൂസിഫറില്‍ ഉണ്ടായിരുന്ന പ്രധാന താരങ്ങളെല്ലാം എമ്പുരാനിലും ഉണ്ടായിരിക്കും. എമ്പുരാനിലൂടെ കഥ പറഞ്ഞ് തീരില്ലെന്നും ലൂസിഫര്‍ പാര്‍ട്ട് 3 ചിലപ്പോള്‍ സംഭവിച്ചേക്കുമെന്ന് പൃഥ്വിരാജ് പറഞ്ഞിട്ടുണ്ട്. എമ്പുരാൻ അണിയിച്ചൊരുക്കിയിരിക്കുന്നത് വമ്പൻ ബജറ്റിലാണ് . സിനിമയുടെ ടീസർ അണിയറ പ്രവർത്തകർ കഴിഞ്ഞ ദിവസം പുറത്തുവിട്ടിരുന്നു. മികച്ച പ്രതികരണമാണ് ടീസറിന് ലഭിക്കുന്നത്.
