കൊച്ചി: നടൻ വിനായകൻ പൊതുശല്യമാണെന്നും, സർക്കാരും അദ്ദേഹത്തെ പിടിച്ചു ചികിത്സയ്ക്കയയ്ക്കണമെന്നും കോൺഗ്രസ് ഡിസിസി പ്രസിഡന്റ് മുഹമ്മദ് ഷിയാസ് അഭിപ്രായപ്പെട്ടു. വിനായകൻ സ്ഥിരമായി നിലവാരമില്ലാത്ത പരാമർശങ്ങൾ നടത്തുകയും, ഫേസ്ബുക്കിലൂടെ അശ്ലീലവും അധിക്ഷേപകരവുമായ പോസ്റ്റുകൾ പങ്കുവയ്ക്കുകയും ചെയ്യുന്നുവെന്ന് അദ്ദേഹം ആരോപിച്ചു. ആരെയായാലും വായിൽ തോന്നിയത് പറയുന്ന രീതിയാണ് സ്വീകരിക്കുന്നതെന്നും, ഇത് എല്ലാ കലാകാരന്മാർക്കും അപമാനമാണെന്നും ഷിയാസ് പറഞ്ഞു.Vinayakan public nuisance: Congress DCC President’s criticism
ലഹരി വ്യാപനത്തിനെതിരെ നാളെ നടക്കാനിരിക്കുന്ന വാക്കത്തോൺ സംബന്ധിച്ച വാർത്താസമ്മേളനത്തിലാണ് ഷിയാസ് ഇക്കാര്യം പറഞ്ഞത്. “നടൻ വിനായകൻ ഒരു പൊതുശല്യം തന്നെയാണ്. സർക്കാരും അദ്ദേഹത്തെ പിടിച്ച് ചികിത്സയ്ക്കയയ്ക്കണം. എല്ലാ കലാകാരന്മാർക്കും അപമാനമായി മാറിയിരിക്കുകയാണ് ഈ നടൻ. എല്ലാറ്റിനും പിന്നിൽ ലഹരിയാണ്,” എന്നാണ് ഷിയാസ് ആരോപിച്ചത്.
കഴിഞ്ഞ ദിവസങ്ങളിൽ അടൂർ ഗോപാലകൃഷ്ണനെയും ഗായകൻ യേശുദാസിനെയും ലക്ഷ്യമാക്കി വിനായകൻ ഫേസ്ബുക്കിൽ അശ്ലീലവും അധിക്ഷേപകരവുമായ പോസ്റ്റുകൾ ഇട്ടിരുന്നു. യേശുദാസിന്റെ ചിത്രം സഹിതമാണ് വിനായകന്റെ പോസ്റ്റ് പ്രചരിച്ചത്. ഇതിനെതിരെ നിരവധി പേർ ശക്തമായ വിമർശനം ഉയർത്തി.
മുമ്പും ഇന്ത്യൻ രാഷ്ട്രീയത്തിലെ പ്രമുഖരെ അധിക്ഷേപിക്കുന്ന പോസ്റ്റുകൾ പങ്കുവെച്ചതിനാൽ വിനായകനെതിരെ പ്രതിഷേധം ഉയര്‍ന്നിരുന്നു. ഇന്ന് വിനായകൻ പൊതുവെ ക്ഷമ ചോദിച്ച് മറ്റൊരു പോസ്റ്റിട്ടെങ്കിലും, പിന്നാലെ മാധ്യമപ്രവർത്തകരെ ലക്ഷ്യമാക്കി വീണ്ടും അധിക്ഷേപകരമായ കുറിപ്പ് ഫേസ്ബുക്കിൽ എഴുതി. യുവജന കോൺഗ്രസ് നേതാവ് എൻ. എസ്. നുസൂർ സംസ്ഥാന പൊലീസ് മേധാവിക്ക് വിനായകനെതിരെ പരാതി നൽകിയിട്ടുണ്ട്.
