കൊട്ടാരക്കര: മുൻ മന്ത്രി ആർ. ബാലകൃഷ്ണപിള്ളയുടെ സ്വത്തുമായി ബന്ധപ്പെട്ട വിൽപത്ര കേസിൽ കോടതി നിർദേശ പ്രകാരം വീണ്ടും മധ്യസ്ഥ ശ്രമം ആരംഭിച്ചു. കൊട്ടാരക്കര സബ് കോടതി ജഡ്ജി എ. ഷാനവാസ് അഭിഭാഷക ടി.ജി. ഗിരിജകുമാരിയെ മീഡിയേറ്ററായി നിയമിച്ചാണ് ശ്രമം പുരോഗമിക്കുന്നത്.Balakrishna Pillai’s property dispute: Mediation efforts resume
സ്വത്ത് തർക്കവുമായി ബന്ധപ്പെട്ട് ആർ. ബാലകൃഷ്ണപിള്ളയുടെ മക്കളായ ഉഷ മോഹൻദാസ്, ബിന്ദു ബാലകൃഷ്ണൻ, മന്ത്രി കെ.ബി. ഗണേഷ്‌കുമാർ എന്നിവരാണ് കോടതിയെ സമീപിച്ചത്.
കേസിന്റെ പശ്ചാത്തലത്തിൽ, മൂത്തമകൾ ഉഷ മോഹൻദാസ് നൽകിയ ഹർജിയിലാണ് പ്രധാനവാദങ്ങൾ ഉന്നയിച്ചിരിക്കുന്നത്. ആർ. ബാലകൃഷ്ണപിള്ളയുടെ പേരിൽ തയാറാക്കിയ വിൽപത്രം കൃത്രിമമാണെന്ന് ആരോപിച്ചാണ് ഹർജി. ഉഷ കോടതിയിൽ സമർപ്പിച്ച സത്യവാങ്മൂലത്തിൽ അനുസരിച്ച്, ബാലകൃഷ്ണപിള്ളയുടെ പേരിൽ കേരളത്തിലും തമിഴ്‌നാട്ടിലുമുള്ള 33 ഇടങ്ങളിലായി കോടിക്കണക്കിന് രൂപ വിലമതിക്കുന്ന ഭൂമികളും 270 പവൻ സ്വർണാഭരണങ്ങളും നിലവിലുണ്ട്.
വാളകം, കൊട്ടാരക്കര, അറയ്ക്കൽ, ചക്കുവരക്കൽ, ഇടമുളക്കൽ ഉൾപ്പെടെ 29 ഇടങ്ങളിൽ ഏകദേശം 50 ഏക്കർ സ്ഥലം ഉൾപ്പെടുന്നു. അതിൽ നിരവധി സ്ഥലങ്ങൾ ഉയർന്ന വ്യാപാര മൂല്യമുള്ളവയാണ്. കൂടാതെ, കൊടൈക്കനാലിലെ ഇരുനില കെട്ടിടം, വാളകത്തെ രാമവിലാസം ഹയർ സെക്കൻഡറി സ്കൂൾ, അറക്കൽ വില്ലേജിലെ ബിഎഡ് കോളേജ് എന്നിവയും പട്ടികയിൽ ഉൾപ്പെടുന്നു.
ബിന്ദുവും ഗണേഷ്‌കുമാറും ഈ വസ്തുക്കൾ പോക്കുവരവാക്കാനുള്ള നടപടികൾ ആരംഭിച്ചതോടെയാണ് ഉഷ കോടതിയെ സമീപിച്ചത്. വസ്തുക്കളുടെ മൂന്നിലൊന്ന് ഭാഗം തനിക്ക് സമ്മാനിക്കണമെന്ന് ഉഷ ആവശ്യപ്പെട്ടു.
മുന്‍പും മധ്യസ്ഥ ശ്രമങ്ങൾ നടന്നിരുന്നെങ്കിലും യാതൊരു ഫലവുമില്ലാതിരുന്ന സാഹചര്യത്തിലാണ് കേസ് വീണ്ടും കോടതിയിൽ എത്തിയതും പുതിയ മധ്യസ്ഥ നടപടികൾ ആരംഭിച്ചതും.
