തിരുവനന്തപുരം: ലഹരി വിരുദ്ധ ക്യാംപയിന് സ്റ്റുഡന്റ് പോലീസ് കേഡറ്റുകളെ നല്ലനിലയില്‍ ഉപയോഗിക്കാനാകണമെന്ന് മുഖ്യമന്ത്രി പിണറായി വിജയന്‍. സ്റ്റുഡന്റ് പോലീസ് കേഡറ്റ് പദ്ധതി അവലോകനയോഗത്തില്‍ സംസാരിക്കുകയായിരുന്നു അദ്ദേഹം. ലഹരിക്കെതിരെയുള്ള സ്‌കൂള്‍തല പരിശീലകരായി പോലീസ്, എക്‌സൈസ് ഉദ്യോഗസ്ഥരുടെ സേവനം അതത് സ്ഥലത്ത് ലഭ്യമാക്കണം. എസ്.പി.സി ശക്തിപ്പെടുത്തുന്നതിന് ആക്ഷന്‍ പ്ലാന്‍ വികസിപ്പിക്കും എസ്.പി.സി, എസ്.സി.ഇ.ആര്‍.ടി, സീമാറ്റ്, ഐ.എം.ജി, കില മുതലായ ഏജന്‍സികളിലെ വിദഗ്ധരെ ആക്ഷന്‍ പ്ലാന്‍ വികസിപ്പിക്കല്‍ ശില്പശാലകളില്‍ പങ്കെടുപ്പിക്കണം.
കുട്ടികളെ തിരഞ്ഞെടുക്കുന്നതിനുള്ള മാനദണ്ഡം പാഠ്യവിഷയങ്ങളിലെ മികവ് മാത്രമാകരുത്. താല്‍പര്യമുള്ള കുട്ടികളെ അര്‍ഹത നോക്കി തിരഞ്ഞെടുക്കണം. തീരദേശ, പിന്നോക്ക മേഖലകളിലെ സ്‌കൂളുകള്‍ക്ക് പദ്ധതിയില്‍ മുന്‍ഗണന നല്‍കണമെന്ന് മുഖ്യമന്ത്രി പറഞ്ഞു. തദ്ദേശ സ്വയംഭരണ സ്ഥാപനങ്ങളുടെ തനത് വികസന ഫണ്ടുകളില്‍ നിന്ന് അനുവദനീയമായ തുക എസ്.പി.സി പദ്ധതി നടപ്പിലാക്കുന്ന സ്‌കൂളുകള്‍ക്ക് ലഭ്യമാക്കണം. സ്‌കൂള്‍, ജില്ല, സംസ്ഥാനതല അവലോകന യോഗങ്ങള്‍ യഥാസമയം നടത്തി പദ്ധതി നടത്തിപ്പിന്റെ പുരോഗതി വിലയിരുത്തണം. എസ്.പി.സി ഔട്ട്ഡോര്‍ മാനുവല്‍ പരിഷ്‌കരണം സമയബന്ധിതമായി പൂര്‍ത്തീകരിക്കാണം.
എസ്.പി.സി പദ്ധതിയുടെ എല്ലാ വശങ്ങളും ക്രമപ്പെടുത്തുന്നതിനും ശക്തിപ്പെടുത്തുന്നതിനും എസ്.പി.സി കാര്യക്ഷമമാക്കുന്നതിനും ഉചിതമായ നിയമം രൂപീകരിക്കണം. പദ്ധതി നടപ്പിലാക്കുന്ന എല്ലാ സ്‌കൂളുകളിലും പരിശീലനത്തിനാവശ്യമായ അധ്യാപകരുടെയും പോലീസ് ഉദ്യോഗസ്ഥരുടെയും സേവനം ലഭ്യമാക്ക?ണം. ഇത് ഉറപ്പാക്കാന്‍ ആഭ്യന്തര വകുപ്പ് അഡീഷണല്‍ ചീഫ് സെക്രട്ടറിയേയും പൊതുവിദ്യാഭ്യാസ വകുപ്പ് പ്രിന്‍സിപ്പല്‍ സെക്രട്ടറിയേയും ചുമതലപ്പെടുത്തി. 2025-26 അധ്യയന വര്‍ഷത്തെ പ്രവര്‍ത്തനങ്ങള്‍ ആസൂത്രണം ചെയ്ത് സീമാറ്റ്, ഐ.എം.ജി, എസ്.പി.സി ഡയറക്ടറേറ്റ് മുതലായവയുമായി കൂടിയാലോചിച്ച് പരിശീലന കലണ്ടര്‍ തയ്യാറാക്കാന്‍ എസ്.സി.ഇ.ആര്‍.ടിയെ ചുമതലപ്പെടുത്തി.
എസ്.പി.സി ടോട്ടല്‍ ഹെല്‍ത്ത് പ്രോഗ്രാമിന്റെ ഭാഗമായി പെയിന്‍ & പാലിയേറ്റീവ്‌കെയര്‍, അടിയന്തിര പ്രഥമശുശ്രൂഷാ നടപടിക്രമങ്ങള്‍ മുതലായവയില്‍ പരിശീലനം നല്‍കാന്‍ ഡോക്ടര്‍മാരുടെ സേവനം ഉറപ്പാക്കണം. ”ശുഭയാത്ര’ പരിപാടി മെച്ചപ്പെട്ട രീതിയില്‍ തുടരുന്നതിന് കേരള മോട്ടോര്‍ വെഹിക്കിള്‍സ് വകുപ്പിന്റെയും കേരള റോഡ് സേഫ്റ്റി അതോറിറ്റിയുടെയും ഉദ്യോഗസ്ഥരുടെ ലഭ്യത ഉറപ്പാക്കണം. വനംവകുപ്പിന്റെ സഹകരണത്തോടെ നടത്തി വരുന്ന ത്രിദിന റെസിഡന്‍ഷ്യല്‍ പ്രകൃതി പഠന ക്യാമ്പുകള്‍ തുടരണം. 2010 ല്‍ തുടങ്ങിയ പദ്ധതി നിലവില്‍ 1049 സ്‌കൂളുകളില്‍ നടപ്പാക്കി വരുന്നുണ്ട്. പൊതുമേഖല സ്ഥാപനങ്ങള്‍, ബാങ്കുകള്‍, കോര്‍പ്പറേറ്റ് സ്ഥാപനങ്ങള്‍ മുതലായവയില്‍ നിന്നുള്ള പൊതുനന്മ ഫണ്ട് പ്രയോജനപ്പെടുത്തി എസ്.പി.സി പദ്ധതി എല്ലാ പൊതുവിദ്യാലയങ്ങളിലേക്കും വ്യാപിപ്പിക്കണമെന്നും മുഖ്യമന്ത്രി പറഞ്ഞു.
യോഗത്തില്‍ മന്ത്രി കെ എന്‍ ബാലഗോപാല്‍, ചീഫ് സെക്രട്ടറി ഡോ. ശാരദാ മുരളീധരന്‍, ആഭ്യന്തരവകുപ്പ് അഡീഷണല്‍ ചീഫ് സെക്രട്ടറി ബിശ്വനാഥ് സിന്‍ഹ, സംസ്ഥാന പൊലീസ് മേധാവി ഷെയ്ഖ് ദര്‍വേഷ് സാഹിബ്, എഡിജിപിമാരായ മനോജ് എബ്രഹാം, പി വിജയന്‍, എസ് ശ്രീജിത്ത്, സ്റ്റുഡന്റ് പോലീസ് കേഡറ്റ് പദ്ധതി ചുമതലയുള്ള ഡിഐജി അജിത ബീഗം, പൊതുവിദ്യാഭ്യാസ പ്രിന്‍സിപ്പല്‍ സെക്രട്ടറി റാണി ജോര്‍ജ്, ഡയറക്ടര്‍ എസ് ഷാനവാസ് തുടങ്ങിയവര്‍ സംസാരിച്ചു.
