വിപണിയിൽ ഏറെ ആവശ്യക്കാരുള്ള, ഔഷധ, പോഷക ഗുണങ്ങളും രുചിയുമുള്ള പഴമാണ് മാതളം. വൈറ്റമിനുകളും നാരുകളും നിരോക്‌സീകാരികളും മാതളത്തിലുണ്ട്. വൈറ്റമിൻ സി, ഇ, കെ, മഗ്‌നീഷ്യം എന്നിവയുമുണ്ട്. ഓർമശക്തിക്കും തലച്ചോറിന്റെ ആരോഗ്യം നിലനിർത്തുന്നതിനും അർബുദം, വൃക്ക രോഗങ്ങൾ എന്നിവയെ പ്രതിരോധിക്കുന്നതിനും ഗുണം ചെയ്യും. ഹൃദയാരോഗ്യം സംരക്ഷിക്കും. തോട് അരച്ചു കഴിക്കുന്നത് അതിസാരത്തിന് ആശ്വാസം നൽകും. വേരിൽനിന്നുള്ള കഷായം വിരകൾക്കെതിരെ പ്രവർത്തിക്കും.
വരണ്ട കാലാവസ്ഥ ഇഷ്ടപ്പെടുന്ന വിളയാണിത്. അനാർക്കലി എന്നും പേരുണ്ട്. (Anar- മാതളം Kali- പഴം). എല്ലാത്തരം മണ്ണിലും വളരുമെങ്കിലും നല്ല നീർവാർച്ചയുള്ളിടമാണ് മാതളക്കൃഷിക്കു യോജ്യം. കമ്പുകൾ നട്ടും പെൻസിൽ വണ്ണമുള്ള കമ്പുകൾ പതിവച്ചും പുതിയ തൈകൾ ഉൽപാദിപ്പിക്കാം. വിത്തുകൾ നട്ടാൽ കായ്ക്കാൻ സമയമെടുക്കും. നിലം നന്നായി കിളച്ചൊരുക്കി കളകൾ നീക്കി 10 അടി അകലത്തിൽ കുഴികൾ എടുക്കുക. 2 അടി ആഴം വേണം. മേൽമണ്ണും ട്രൈക്കോഡെർമ ചേർത്തു സമ്പു ഷ്ടീകരിച്ച 10 കിലോ ചാണകവും ഒരു കിലോ വേപ്പിൻപിണ്ണാക്കും എല്ലുപൊടിയും ചേർത്തു കുഴിമൂടുക. ഒരാഴ്ചയ്ക്കുശേഷം 5 ഗ്രാം വാം ചേർത്തിളക്കി തൈ നട്ട് നന നൽകുക.
നാലടി ഉയരമെത്തുമ്പോൾ ചെടിയുടെ ചുവട്ടിൽനിന്ന് 50 സെ.മീ. വരെയുള്ള ശിഖരങ്ങൾ മുറിച്ചു മാറ്റണം. ഒന്നര വർഷം പ്രായമാകുമ്പോൾ എല്ലാ പാർശ്വശിഖരങ്ങളും മുറിച്ച് കുടയുടെ ആകൃതിയിൽ ക്രമീകരിക്കുക. ഫെബ്രുവരിയിൽ ഇലകൾ പൊഴിയുന്നതോടെ നന നിർത്തണം. പൂക്കൾ ഉണ്ടായി 7 മാസമാകുമ്പോൾ വിളവെടുക്കാം. കായ്കൾ വളരെ ചെറുതായിരിക്കുമ്പോൾ കീടങ്ങളിൽനിന്നു രക്ഷിക്കാൻ താഴ്ഭാഗം തുറന്നുവച്ച് പൊതിഞ്ഞു കെട്ടണം.
വളപ്രയോഗം
നട്ട് ഒരു മാസം മുതൽ മൂന്നു മാസം വരെ 19:19:19 3 ഗ്രാം ഒരു ലീറ്റർ വെള്ളത്തിൽ കലക്കി തളിക്കുക. 4 മാസം ആകുമ്പോൾ 0:52:34 (Mono Potassium Phosphate) 3 ഗ്രാം ഒരു ലീറ്റർ വെള്ളത്തിൽ തളിക്കുക. 2 ആഴ്ചയ്ക്കുശേഷം 13:0:45 (പൊട്ടസ്യം നൈട്രേറ്റ്) 2 ഗ്രാം, കാത്സ്യം നൈട്രേറ്റ് 3 ഗ്രാം, ബോറോൺ 20% ഒരു ഗ്രാം എന്നിവ മൂന്നും കൂടി (ആകെ 6 ഗ്രാം) ഒരു ലീറ്റർ വെള്ളത്തിൽ കലക്കി തളിക്കുക. 6-ാം മാസത്തിൽ ഹ്യുമിക് ആസിഡ് (2 മി.ലീ. ഒരു ലീറ്റർ വെള്ളത്തിൽ കലക്കിയത്), പൊട്ടാസ്യം സിലിക്കേറ്റ് (ഒരു മി.ലീ.) പസീലിയോമൈസിസ് (10 ഗ്രാം ഒരു ലീറ്റർ വെള്ളത്തിൽ കലക്കിയത്) സീവീഡ് എക്‌സ്ട്രാക്ട് – സകാരിക (5 ഗ്രാം) എന്നിവ മണ്ണിൽ ചേർക്കുക. നാലാം മാസത്തിൽ ശുപാർശ ചെയ്തിരിക്കുന്ന വളം എല്ലാ ആറു മാസം കൂടുമ്പോഴെങ്കിലും തളിക്കണം. രോഗങ്ങൾക്കെതിരെ കോപ്പർ ഓക്‌സിക്ലോറൈഡ് 3 ഗ്രാം ഒരു ലീറ്റർ വെള്ളത്തിൽ തളിക്കുക. രണ്ടാഴ്ചയ്ക്കുശേഷം ബിവേറിയ 20 ഗ്രാം ഒരു ലീറ്റർ വെള്ളത്തിൽ കലക്കി തളിക്കുക. മാസത്തിലൊരിക്കൽ സ്യൂഡോമോണാസ് 20 ഗ്രാം ഒരു ലീറ്റർ വെള്ളത്തിൽ കലക്കി തളിക്കുക.
മാതളത്തിന്റെ ആരോഗ്യ ഗുണങ്ങൾ
ആരോഗ്യം സംരക്ഷിക്കാൻ നിർബന്ധമായും കഴിക്കേണ്ട പഴങ്ങളിലൊന്നാണ് മാതളം. ധാരാളം പോഷക?ഗുണങ്ങൾ മാതളത്തിൽ അടങ്ങിയിരിക്കുന്നു. കാർബോഹൈഡ്രേറ്റ്‌സ് നിറഞ്ഞ മാതളനാരങ്ങ രോഗപ്രതിരോധ ശേഷി വർധിപ്പിക്കുകയും ദഹന പ്രശ്‌നങ്ങൾ അകറ്റുന്നതിനും സഹായിക്കുന്നു.
മാതളനാരങ്ങയ്ക്ക് ആന്റി ഓക്സിഡന്റ്, ആന്റി വൈറൽ, ആന്റി ട്യൂമർ പ്രോപ്പർട്ടികൾ അടങ്ങിയിട്ടുണ്ട്. ഇത് വിറ്റാമിനുകളുടെ പ്രത്യേകിച്ച് വിറ്റാമിൻ എ, വിറ്റാമിൻ സി, വിറ്റാമിൻ ഇ, ഫോളിക് ആസിഡ് എന്നിവയുടെ നല്ല ഉറവിടം കൂടിയാണ്. ഇതിൽ രണ്ട് സംയുക്തങ്ങൾ അടങ്ങിയിരിക്കുന്നു. പ്യൂണിക്കലാജിൻ, പ്യൂനിക് ആസിഡ്.
മാതളനാരങ്ങയിൽ അടങ്ങിയിരിക്കുന്ന ആന്റിഓക്സിഡന്റുകൾ വൈനിനേക്കാളും ഗ്രീൻ ടീയേക്കാളും ഏകദേശം മൂന്നിരട്ടി കൂടുതലാണ്. ദിവസേന മാതളനാരങ്ങ കഴിക്കുകയോ ജ്യൂസ് കുടിക്കുകയോ ചെയ്യുന്നത് പ്രതിരോധശേഷിക്ക് മികച്ച സഹായമാണ്.
ഒരു മാതളനാരങ്ങയിൽ 64 കലോറി അടങ്ങിയിട്ടുണ്ട്. ഇതിൽ കാർബോഹൈഡ്രേറ്റിന്റെയും സ്വാഭാവിക പഞ്ചസാരയുടെയും ഉയർന്ന ഉള്ളടക്കമുണ്ട്. ഗർഭകാലത്തും മുലയൂട്ടുന്ന സമയത്തും മാതളനാരങ്ങ ജ്യൂസ് കഴിക്കുന്നത് സുരക്ഷിതമാണ്. മാതളനാരങ്ങ ജ്യൂസ് കുടിക്കുന്നത് രക്തസമ്മർദ്ദം നിയന്ത്രിക്കാൻ സഹായിക്കും.
മാതളനാരങ്ങയിൽ ആന്റി ഓക്സിഡന്റുകളാൽ സമ്പുഷ്ടമാണ്. മാതളനാരങ്ങയുടെ വിത്തുകൾ രക്തത്തിലെ പ്ലേറ്റ്ലെറ്റുകൾ കട്ടപിടിക്കുന്നത് തടയുന്നു. ഗർഭിണികൾ മാതളം കഴിക്കുന്നതിലൂടെ പോഷകം ലഭിക്കുകയും ഗർഭസ്ഥ ശിശുവിന്റെ ആരോഗ്യം മെച്ചപ്പെടുകയും ചെയ്യും. ഓർമ്മശക്തി വർധിപ്പിക്കാനും മാതളം സഹായിക്കും. ക്യാൻസറിനു സാധ്യതയുള്ള മുഴകളുടെ വളർച്ച കുറയ്ക്കാനും ക്യാൻസർ സെല്ലുകളെ നശിപ്പിക്കാനും മാതളത്തിനു കഴിയും.
വർധിച്ചുവരുന്ന പ്രായവും ജീവിതരീതിയും അനുസരിച്ച്, കൊളസ്ട്രോൾ കാരണം നമ്മുടെ ധമനികളുടെ ഭിത്തികൾ കഠിനമാവുകയും ചിലപ്പോൾ തടസ്സങ്ങൾ ഉണ്ടാകുകയും ചെയ്യുന്നു. മാതളനാരങ്ങയുടെ ആന്റി ഓക്സിഡന്റ് ഗുണം ചീത്ത കൊളസ്ട്രോൾ ഓക്സിഡൈസ് ചെയ്യുന്നത് തടയുന്നു. അതിനാൽ, മാതളനാരങ്ങ കഴിക്കുന്നത് അധിക കൊഴുപ്പ് നീക്കം ചെയ്യുന്നു.മാതളനാരങ്ങ ജ്യൂസിന് പ്രോസ്റ്റേറ്റ് ക്യാൻസറിനെ ചെറുക്കാനുള്ള കഴിവുണ്ടെന്ന് രണ്ട് പഠനങ്ങൾ അവകാശപ്പെടുന്നു. മാതളനാരങ്ങ ജ്യൂസ് വളർച്ചയെ മന്ദഗതിയിലാക്കുകയും സംസ്‌കരിച്ച ക്യാൻസർ കോശങ്ങളെ നശിപ്പിക്കുകയും ചെയ്തുവെന്ന് ഒരു പരീക്ഷണത്തിൽ തെളിഞ്ഞു.
